A noite da Noite boa
a noite anda a ruar
polos camiños da terra
e polos vieiros do mar
espallando a Boa Nova
que en Belén tivo lugar.
Cunha cantiga nos beizos
a noite anda de ruada
espertando nas estrelas
pra que lle fagan compaña
deica onde dorme o Neniño
nun berce feito de pallas.
O longo cantar da noite,
fonda cantiga sin beiras
chega deica Xesusiño
choutando vales e serras.
Xesús escoita quediño
o cantar da noite leda.
Cala a noite ó lumbrigar
i o día empeza a cantar.